Նկարագիր

Բարձր տեխնոլոգիաների ոլորտի պետական աջակցության ծրագիրը մեկնարկել է 2025 թ․ հունվարի 1-ից։ Պետական աջակցությունը տրամադրվում է բարձր տեխնոլոգիաների ոլորտում գործունեություն իրականացնող տնտեսավարող սուբյեկտներին՝ օրենքով և Հայաստանի Հանրապետության կառավարության համապատասխան որոշումներով սահմանված կարգով։

Ծրագիրն իրականացվում է առցանց եղանակով՝ ծառայությունների միասնական հարթակի միջոցով։ Դիմումը ներկայացվում է էլեկտրոնային եղանակով, իսկ աջակցության հաշվարկը և տրամադրման գործընթացը կազմակերպվում են ինքնաշխատ համակարգի միջոցով՝ հիմք ընդունելով դիմողի և նրա աշխատողների վերաբերյալ համապատասխան պետական շտեմարաններում առկա տվյալները։

Եռամսյակային կտրվածքով տրամադրվում է պետական աջակցություն՝ համապատասխան աշխատողների համար վճարված եկամտային հարկի հետևյալ չափերով՝

• աշխատանքային միգրանտներին՝ 60% (պետական աջակցությունը գործատուի միջոցով տրվում է աշխատանքային միգրանտին),
• նոր աշխատողներ ներգրավելու համար՝ 60% (տրվում է տնտեսավարող սուբյեկտին),
• մասնագիտական աշխատանք կատարող կադրերի պատրաստման և վերապատրաստման համար՝ 50% (տրվում է տնտեսավարող սուբյեկտին)։

Ծրագրի նպատակը

Ծրագրի նպատակն է խթանել բարձր տեխնոլոգիաների ոլորտի կայուն զարգացումը, նպաստել ոլորտում որակյալ մասնագիտական աշխատուժի ներգրավմանը, աշխատողների գիտելիքների և հմտությունների կատարելագործմանը, ինչպես նաև աջակցել բարձր տեխնոլոգիական ընկերությունների աճին և մրցունակության բարձրացմանը։

Ծրագիրը միաժամանակ նպաստում է պետություն-մասնավոր հատված համագործակցության ամրապնդմանը, բարձր տեխնոլոգիաների ոլորտում նոր աշխատատեղերի ստեղծմանը և Հայաստանի Հանրապետության տնտեսության տեխնոլոգիական ներուժի զարգացմանը։

Թիրախային խումբը

Պետական աջակցության համար կարող են դիմել Հայաստանի Հանրապետության ռեզիդենտ իրավաբանական անձինք և անհատ ձեռնարկատերերը (տնտեսավարող սուբյեկտներ), որոնք իրականացնում են բարձր տեխնոլոգիաների ոլորտի պետական աջակցության ենթակա գործունեություն։ Բարձր տեխնոլոգիաների ոլորտի գործունեության տեսակները սահմանված են Հայաստանի Հանրապետության կառավարության 2025 թվականի փետրվարի 13-ի N 142-Ն որոշմամբ։

Հայցվող ժամանակաշրջանում տնտեսավարող սուբյեկտի՝ ավելացված արժեքի հարկի և (կամ) շրջանառության հարկի հաշվարկներով հայտարարագրված գործունեության բոլոր տեսակներից իրացման շրջանառության առնվազն 90 տոկոսը պետք է ձևավորված լինի բարձր տեխնոլոգիաների ոլորտի գործունեության տեսակներից։

Դիմելու չափորոշիչները

Պետական աջակցության համար դիմող տնտեսավարող սուբյեկտը պետք է բավարարի իրավական ակտերով սահմանված պահանջներին, այդ թվում՝

• իրականացնի բարձր տեխնոլոգիաների ոլորտի պետական աջակցության ենթակա գործունեություն և հաշվետու ժամանակաշրջանում ապահովի բարձր տեխնոլոգիաների ոլորտի գործունեության տեսակներից ձևավորված իրացման շրջանառության սահմանված նվազագույն շեմը,
• դիմելու օրվան նախորդող օրվա դրությամբ չունենա 100,000 ՀՀ դրամը գերազանցող՝ հարկային մարմնի կողմից վերահսկվող եկամուտների գծով պարտավորություններ,
• համապատասխանի «Բարձր տեխնոլոգիաների ոլորտի պետական աջակցության մասին» ՀՀ օրենքով և դրա հիման վրա ընդունված ենթաօրենսդրական ակտերով սահմանված այլ պահանջներին։

Դիմելու պայմանները

Պետական աջակցությունը տրամադրվում է եռամսյակային կտրվածքով։

Յուրաքանչյուր եռամսյակի համար աջակցություն ստանալու նպատակով դիմումը ներկայացվում է տվյալ եռամսյակի հարկային հաշվարկների ներկայացման վերջնաժամկետին հաջորդող աշխատանքային օրվանից հետո՝ մինչև հաջորդ ամսվա 20-ը ներառյալ։

Ժամկետի ավարտից հետո տվյալ հաշվետու ժամանակաշրջանի համար դիմումներ չեն ընդունվում։

Դիմելու կարգը

Դիմումը ներկայացվում է առցանց՝ ծառայությունների միասնական հարթակի միջոցով՝

https://hartak.am/services/39dd295c-593d-407d-b5fa-14b819c5f4b5/yesem/

կամ https://benefits.hightech.gov.am/ 

Դիմումը կարող է ներկայացնել տնտեսավարող սուբյեկտի ղեկավարը կամ սահմանված կարգով լիազորված անձը։ 

Դիմում ներկայացնելու համար անհրաժեշտ է անցնել նույնականացում «ԵսԵմ» համակարգի միջոցով։

Առցանց դիմումը ներկայացնելիս փաստաթղթեր չեն կցվում։

Համակարգում անհրաժեշտ է լրացնել՝

• տնտեսավարող սուբյեկտի բանկային հաշվեհամարը,
• կոնտակտային հեռախոսահամարը,
• էլեկտրոնային փոստի հասցեն,
• վերապատրաստված աշխատակիցների համար աջակցություն հայցելու դեպքում աշխատակիցների ՀԾՀ-ները և հավաստագրման տվյալները։

Դիմումը ներկայացնելուց հետո համակարգն իրականացնում է իրավական ակտերով սահմանված համապատասխան ստուգումները։ Լրացուցիչ տեղեկատվության անհրաժեշտության դեպքում Նախարարությունը կապ է հաստատում դիմողի հետ։

Հայտի հաստատման դեպքում աջակցության գումարը փոխանցվում է տնտեսավարող սուբյեկտի ներկայացրած բանկային հաշվեհամարին՝ սահմանված ժամկետում։

Աշխատանքային միգրանտին աջակցության դեպքում աջակցության գումարը փոխանցվում է տնտեսավարող սուբյեկտին, իսկ տնտեսավարող սուբյեկտը պարտավոր է ստացված գումարը հինգ աշխատանքային օրվա ընթացքում փոխանցել աշխատանքային միգրանտին։

Մերժման հիմքերը

Պետական աջակցության տրամադրումը կարող է մերժվել, եթե՝

• դիմողը չի համապատասխանում իրավական ակտերով սահմանված պահանջներին,
• ներկայացված տվյալները թերի են կամ չեն համապատասխանում սահմանված պահանջներին,
• դիմելու օրվան նախորդող օրվա դրությամբ տնտեսավարող սուբյեկտն ունի 100,000 ՀՀ դրամը գերազանցող հարկային պարտավորություն,
• առկա են իրավական ակտերով սահմանված մերժման այլ հիմքեր։

Լրացուցիչ տեղեկատվություն

Բարձր տեխնոլոգիաների ոլորտի պետական աջակցության գործընթացը կարգավորվում է հետևյալ իրավական ակտերով՝

• «Բարձր տեխնոլոգիաների ոլորտի պետական աջակցության մասին» ՀՀ օրենք,
• ՀՀ կառավարության 2025 թվականի ապրիլի 17-ի N 450-Ն որոշում,
• ՀՀ կառավարության 2025 թվականի փետրվարի 13-ի N 142-Ն որոշում,
• ՀՀ կառավարության 2025 թվականի մարտի 27-ի N 353-Ն որոշում։

Կոնտակտային տվյալներ