Նախարար Ռոբերտ Խաչատրյանը ողջունել է հայ-ավստրիական գործարար համաժողովի մասնակիցներին
![](/images/post_1696694192169669419265217fb0f03ee.jpg)
Երևանում ապրիլի 27-ին կայացել է «Ավստրիա Showcase «Խելացի տեխնոլոգիաներ» Հայաստանում» հայ-ավստրիական գործարար համաժողովը, որի նպատակն է ամրապնդել և ընդլայնել համագործակցությունը տեխնոլոգիական ոլորտի հայկական և ավստրիական ընկերությունների միջև։
Միջոցառման մասնակիցներին ողջունել է ՀՀ բարձր տեխնոլոգիական արդյունաբերության նախարար Ռոբերտ Խաչատրյանը։ Նախարարը նշել է, որ նորարարությունն առանցքային դեր ունի Հայաստանի ապագա հաջողությունների համար, որը ոչ միայն նպաստում է երկարաժամկետ տնտեսական աճին, այլև լուրջ խթան է մեր երկրի առջև ծառացած սոցիալական և բնապահպանական խնդիրների լուծման համար:
«Գիտության և տեխնոլոգիաների զարգացումը Հայաստանի կառավարության և մասնավորապես Բարձր տեխնոլոգիական արդյունաբերության նախարարության որդեգրած ինովացիոն քաղաքականության անբաժանելի մասն է։ Մեր գերխնդիրն է ունենալ այնպիսի Հայաստան, որտեղ բարձրարժեք գիտատեխնիկական նվաճումներ են ստեղծվում և ներդրվում տնտեսության բոլոր ճյուղերում։ Այդ նպատակին հասնելու համար մենք կարևորում ենք մարդկային կապիտալի զարգացման ուղղությամբ շարունակական ներդրումների իրականացումը, ինչպես նաև գիտական և գործարար ոլորտների նրեկայացուցիչների միջև կապերի ամրապնդումը»,- նշել է նախարար Ռոբերտ Խաչատրյանը, նաև ընդգծել, որ այս միջոցառումն Ավստրիայում գործող ընկերությունների համար լավ հնարավորություն է՝ ծանոթանալու հայկական ընկերությունների արտադրանքին ու ներուժին։
Ներկաներին ողջունել են նաև ՌԴ-ում Ավստրիայի դեսպանության առևտրային խորհրդատու Ռուդոլֆ Լուկավսկին, Հայաստանի Հանրապետությունում Ավստրիայի Հանրապետության արտակարգ և լիազոր դեսպան Թոմաս Մյուլմանը, Enterprise Armenia ընկերության գլխավոր տնօրեն Լևոն Օհանեսյանը։ Իրենց խոսքում նրանք անդրադարձել են երկու երկրների միջև մի շարք ոլորտներում հաստատված համագործակցությանը, համատեղ իրականացված միջոցառումներին ու ծրագրերին, «Ավստրիա Showcase «Խելացի տեխնոլոգիաներ» Հայաստանում» համաժողովի կարևորությանը, մասնակիցներին մաղթել արդյունավետ քննարկումներ և շոշափելի արդյունքներ։
Միջոցառմանը «Հայաստանի բարձր տեխնոլոգիաների ոլորտը» զեկույցով հանդես է եկել ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը։ Նա անդրադարձել է նախարարության
Այնուհետև ցուցադրվել են կարճ տեսահոլովակներ՝ Հայաստանի և Ավստրիայի տեխնոլոգիական ոլորտի հաջողությունների մասին։ Հաջորդիվ՝ միջոցառման մասնակից ընկերությունները ներկայացրել են իրենց գործունեությունն ու արտադրանքը։
«Ավստրիա Showcase «Խելացի տեխնոլոգիաներ» Հայաստանում» հայ-ավստրիական գործարար համաժողովը կազմակերպվել էր ՌԴ-ում Ավստրիայի դեսպանության և ՀՀ բարձր տեխնոլոգիական արդյունաբերության նախարարության համագործակցությամբ։
Համաժողովին մասնակցել են տեխնոլոգիական ոլորտի 10 ավստրիական ընկերություններ, որոնք ներկայացրել են նորագույն տեխնոլոգիաներ և սարքավորումներ գյուղատնտեսության, արդյունաբերության, փայտամշակման, մետալուրգիական և լեռնահանքային արդյունաբերության, մի շարք այլ ոլորտներում։