Նախարար Ռոբերտ Խաչատրյանը մասնակցել է Եգիպտոսի Ազգային տոնին նվիրված երեկոյին

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը հուլիսի 10-ին մասնակցել է Եգիպտոսի Արաբական Հանրապետության Ազգային տոնին նվիրված երեկոյին:

Ռոբերտ Խաչատրյանն իր ելույթում ՀՀ կառավարության և իր անունից շնորհավորել է Եգիպտոսի Արաբական Հանրապետության Ազգային տոնի՝ Հեղափոխության օրվա  71-ամյա հոբելյանի կապակցությամբ։

«Հայաստանն անկախությունից ի վեր բարեկամական սերտ հարաբերություններ է հաստատել Եգիպտոսի հետ, որը տարեցտարի վերընթաց զարգացում է ապրել, ընդլայնվել և ամրապնդվել է։ Ինձ համար մեծ պատիվ է մասնակցել բարեկամ Եգիպտոսի համար կարևոր այս տոնակատարությանը։

Գոհունակությամբ եմ արձանագրում, որ մեր երկկողմ օրակարգն իրապես հագեցած է, և այս տարիներին գրեթե բոլոր ոլորտներում էական առաջընթաց է գրանցվել․ ունեցել ենք բազմաթիվ փոխադարձ այցելություններ, բարձրաստիճան հանդիպումներ, փորձագիտական այցեր, մասնակցություն երկու երկրների կողմից կազմակերպված տարբեր համաժողովների և ցուցահանդեսների, մեր երկրների միջև ստորագրվել են համագործակցության հինգ տասնյակից ավելի փաստաթղթեր, աճում է առևտրաշրջանառությունը»,- ասել է Ռոբերտ Խաչատրյանը։

Նախարարը կարևորել է սեպտեմբերի 24-26-ը Կահիրեում նախատեսված Տնտեսական, գիտական և տեխնիկական համագործակցության հարցերով հայ-եգիպտական միջկառավարական համատեղ հանձնաժողովի 6-րդ նիստի և դրա շրջանակներում գործարար համաժողովի անցկացումը, ինչը ևս մեկ կարևոր խթան կհանդիսանա առևտրատնտեսական և այլ ոլորտներում փոխգործակցության խորացման համար։

Նախարարը շեշտել է նաև, որ հայ-եգիպտական ջերմ հարաբերությունները հիմնված են դարերի պատմություն ունեցող հայ և եգիպտացի ժողովուրդների բարեկամության, փոխադարձ հարգանքի և վստահության վրա, որտեղ առանձնահատուկ դերակատարություն ունի Եգիպտոսի հայ համայնքը, որը դարեր շարունակ իր նպաստն է բերել ինչպես Եգիպտոսի զարգացմանը, այնպես էլ Հայաստան-Եգիպտոս կապերի ամրապնդմանը։

«Այս համատեքստում պետք է ընդգծեմ, որ ՀՀ կառավարությունը բարձր է գնահատում և շնորհակալ է այն մշտական հոգածության համար, որը Եգիպտոսի կառավարությունը պետական մակարդակով դրսևորում է Եգիպտոսում բնակվող մեր հայրենակիցների նկատմամբ։ Հայաստանը և հայ ժողովուրդը երբեք չեն մոռանում Եգիպտոսի ժողովրդի և իշխանությունների կողմից ցեղասպանությունից փրկված իր զավակներին ցուցաբերված գրկաբաց ընդունելությունն ու աջակցությունը»,- նշել է Ռոբերտ Խաչատրյանը։

Անդրադառնալով տեխնոլոգիաների և թվայնացման ոլորտներում երկու պետությունների միջև համագործակցությանը՝ նախարարն ընդգծել է, որ երկկողմ և բազմակողմ ձևաչափով հանդիպումների ընթացքում քննարկվել են փոխգործակցության օրակարգի ընդլայնման, փորձի փոխանակման, մասնավոր ընկերությունների միջև երկխոսության հարթակների ձևավորման մի շարք հնարավորություններ։ Ռոբերտ Խաչատրյանը նաև նշել է, որ 2023թ․ դեկտեմբերի 4-7-ը նախատեսվում է մասնակցել Եգիպտոսում կայանալիք “EDEX” պաշտպանական տեխնոլոգիաների երրորդ միջազգային ցուցահանդեսին, որը լավ հնարավորություն է ներկայացնելու Հայաստանի տեխնոլոգիական ձեռքբերումները, խթանելու գործընկերների հետ փոխշահավետ և արդյունավետ փոխգործակցությունը։

Ամփոփելով խոսքը՝ նախարարն ընդգծել է, որ Հայաստանի և Եգիպտոսի միջև հարաբերություններն ունեն առավել զարգանալու և ընդլայնվելու մեծ ներուժ։

Հայաստանի Հանրապետությունում Եգիպտոսի Արաբական Հանրապետության արտակարգ և լիազոր դեսպան Սերենադ Գամիլը ողջունել է միջոցառման մասնակիցներին, շնորհակալություն հայտնել նախարարին իրենց համար կարևոր և պատմական տոնին նվիրված երեկոյին ներկա գտնվելու և ողջույնի խոսքով հանդես գալու համար:

Դեսպանն ընդգծել է, որ Հայաստանի և Եգիպտոսի միջև երկար տարիների բարեկամական հարաբերություններ են հաստատված։ Արաբական երկրներից Եգիպտոսն առաջիններից էր, որ Հայաստանի հետ 1992թ. հաստատել է դիվանագիտական հարաբերություններ, իսկ 2022 թվականին արդեն նշվել է այդ հարաբերությունների հաստատման 30 ամյակը։

«Մեծ պատիվ է ինձ համար ընդունել ձեզ այսօր այստեղ՝ նշելու 1952 թվականի հեղափոխության 71-րդ ամյակը, որը կարևոր իրադարձություն է ոչ միայն Եգիպտոսի, այլև աֆրիկյան մայրցամաքի և ողջ արաբական աշխարհի համար»,- նշել է դեսպան Սերենադ Գամիլը։

Դեսպանն անդրադարձել է նաև տարեսկզբին Եգիպտոսի Արաբական Հանրապետության նախագահ Աբդել Ֆաթթահ Ալ-Սիսիի պաշտոնական այցին Հայաստան, այն համարել պատմական, քանի որ երկու երկրների միջև դիվանագիտական հարաբերությունների հաստատումից ի վեր այն Եգիպտոսի նախագահի 1-ին այցն էր մեր երկիր։ Սերենադ Գամիլը նաև ընդգծել է պատրաստակամությունը՝ բոլոր ոլորտներում զարգացնելու հարաբերությունները, որպեսզի էլ ավելի ամրապնդվի գործակցությունը երկու բարեկամական երկրների միջև։