Մխիթար Հայրապետյանն ամփոփել է պաշտոնավարման 100 օրվա գործունեությունը

ՀՀ բարձր տեխնոլոգիական արդյունաբերության նախարար Մխիթար Հայրապետյանն ապրիլի 15-ին տեղի ունեցած մամուլի ասուլիսում ամփոփել է պաշտոնավարման 100 օրը։

Մխիթար Հայրապետյանը ներկայացրել է նախարարության գործունեության ուղղությունները, կատարված աշխատանքներն ու ծրագրերը։

Ռազմարդյունաբերության ոլորտ

Մշակվել է 1 օրենքի նախագիծ, կատարվել է 3 գործող որոշումների փոփոխություն, 3 նոր որոշումների նախագծերի մշակման և շրջանառման աշխատանքներ: Նախաձեռնվել և շրջանառվել է ԲՏԱՆ ռազմարդյունաբերության կոմիտեի նոր կառուցվածքի նախագիծը։ Իրականացվել են ներքին փորձարկումներ՝ մի քանի զինատեսակի և կառավարման համակարգերի գծով, որոնք մոտ ապագայում հնարավոր կլինի կիրառել ՀՀ զինված ուժերում:

Բարձր տեխնոլոգիաների և տեղեկատվական տեխնոլոգիաների ոլորտ

 Նախարարությունը մեծ ջանքեր է գործադրել ՏՏ ոլորտի զարգացմանը նպաստող նոր օրենսդրական փաթեթի մշակման ուղղությամբ։

 «Մասնագետների պատրաստման բուհ-մասնավոր հատված համագործակցություն» ծրագրում կատարվել են փոփոխություններ: Այս տարի ծրագիրն իրականացվելու է հետևյալ ուղղություններով՝

• Մասսայական ուսուցում. նախատեսվում է տեխնոլոգիական ոլորտի բազային գիտելիքներ մատուցել 3 մարզերի՝ Սյունիքի, Գեղարքունիքի, Վայոց Ձորի շուրջ 300 մասնակիցների համար:
• Կարողությունների զարգացում. դրամաշնորհներ կհատկացվեն ՏՏ և ինժեներական ոլորտի կազմակերպություններին՝ նոր աշխատողների ներգրավման և աշխատակիցների մասնագիտական կարողությունների զարգացման նպատակով:
• Գործնական հմտությունների կատարելագործում. նախատեսվում են եռօրյա միջոցառումներ՝ հաքաթոններ կազմակերպել ԲՏ ոլորտի կազմակերպությունների, գիտական և կրթական կենտրոնների մասնակցությամբ:

Տիեզերական ոլորտ

 2024թ. հունվարին Հայաստանում ստեղծվել է արբանյակային տվյալների ընդունիչ կայան։

• 2024թ. մարտի 27-ին Հայաստանի երկու արբանյակները գրանցվել են ՄԱԿ-ի բաց տիեզերք արձակված օբյեկտների գրանցամատյանում:
• Սկսվել է «Արմսաթ 1» արբանյակից ստացված տվյալների կիրառությունը։
• Քայլեր են ձեռնարկվել «Արմսաթ 1» արբանյակի կարողությունները ՀՀ ոլորտային գիտական ուղղություններին ծառայեցնելու ուղղությամբ:

Թվայնացման ոլորտ

Շրջանառվել է «Կիբեռանվտանգության մասին» օրենքի նախագիծը: Նախագծի ընդունմամբ իրավական հիմք է ստեղծվում կիբեռանվտանգության մարտահրավերներին, դրանց արձագանքելու, կիբեռանվտանգության ապահովման և հասարակության լայն շրջանակների իրազեկման և կիբեռգրագիտության մակարդակի բարձրացման համար:

Մեկնարկել են «Ամպային առաջինը» (Cloud First) քաղաքականության մշակման, ներդրման և դրա իրավական հիմքերի ստեղծման աշխատանքները։ Անցումն ամպային ծառայության հնարավորություն կտա հրաժարվել ավանդական և մեծածավալ ռեսուրսներ պահանջող սերվերային տնտեսություններից:

Կապի ոլորտ

Նախատեսվում է թվային ռադիոհեռարձակման համակարգի ներդրման ծրագիր։ Շատ կարևոր էր բազային և շարժական մոնիթորինգի համակարգի ներդրումը։ Այդ ուղղությամբ տևական ժամանակ աշխատանքներ իրականացվել են, և դրանք շարունակական են։ Հայաստանի հեռուստատեսային և ռադիոհաղորդիչ ցանց (ՀՀՌՑ) ընկերության պատվիրատուներին մատուցված ծառայությունների մասով տասնամյակների ընթացքում կուտակված դեբիտորական պարտքերը մարվել են։

 Փոստի ոլորտ

ՀՀ կառավարության համապատասխան որոշումներով փոփոխություններ ու լրացումներ են կատարվել «Փոստային կապի օպերատորի գործունեության» և «Սուրհանդակային օպերատորի գործունեության» կանոնակարգերում։