Քննարկվել են ՀՀ բարձր տեխնոլոգիական արդյունաբերության նախարարության և Մատենադարանի միջև համագործակցության հնարավորությունները

ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը և նախարարության թվայնացման վարչության պետ Արշակ Քերոբյանը Մեսրոպ Մաշտոցի անվան Մատենադարանում հանդիպում են ունեցել Մատենադարանի տնօրեն Արա Խզմալյանի հետ։

Հանդիպման ընթացքում քննարկվել են ՀՀ բարձր տեխնոլոգիական արդյունաբերության նախարարության և Մատենադարանի միջև համագործակցության հնարավորությունները:

Բարձր գնահատելով Մատենադարանում կատարվող աշխատանքները՝ Գևորգ Մանթաշյանը խոսել է ձեռագրատան թվային տեխնոլոգիաների գործիքակազմն առավել հագեցնելու անհրաժեշտության մասին: Նախարարի տեղակալն առաջարկել է նաև պետական և մասնավոր կազմակերպությունների մասնակցությամբ  Մատենադարանում կազմակերպել աշխատաժողով՝  հումանիտար գիտական հետազոտություններում թվային տեխնոլոգիաների կիրառման հնարավորությունների վերաբերյալ:

Արա Խզմալյանը ողջունել է առաջարկը՝ նշելով, որ աշխատաժողովը լավ հնարավորություն է ներկայացնելու արված աշխատանքը, վեր հանելու առկա խնդիրները և մատնանշելու դրանց լուծման ուղիները:

Մատենադարանի տնօրենը կարևորել է բնագրագիտական հետազոտություններում թվային տեխնոլոգիաների կիրառման անհրաժեշտությունը, ընդգծել, որ այն  առանձնահատուկ տեղ է զբաղեցնում Մատենադարանի զարգացման  ծրագրում:

Հանդիպմանը ընթացքում Մատենադարանի գիտաշխատողները ներկայացրել են թվային հումանիտար գիտությունների զարգացման հնարավորությունները, մասնավորապես՝ նորագույն տեխնոլոգիաների կիրառումը միջնադարյան բնագրերի գիտաքննական տեքստերի պատրաստման գործում, ինչպես նաև Մատենադարանի թվային ռեսուրսներն ու առկա խնդիրները:

Այցի ավարտին հյուրերը շրջել են Մատենադարանի Թվայնացման բաժնում, ծանոթացել ձեռագրերի թվայնացման աշխատանքներին։