Բարձր տեխնոլոգիական արդյունաբերության նախարարություն
Կատարում քննարկվել են բարձր տեխնոլոգիաների ոլորտում երկու երկրների միջև համագործակցության հեռանկարները
ՀՀ բարձր տեխնոլոգիական արդյունաբերության նախարար Ռոբերտ Խաչատրյանը ՀՀ նախագահ Վահագն Խաչատուրյանի գլխավորած պատվիրակության կազմում մայիսի 22-25-ն աշխատանքային այցով Կատար Պետությունում էր:
Այցի շրջանակում նախարար Խաչատրյանը մասնակցել է Կատարի տնտեսական համաժողովի հանդիսավոր բացմանը: Այնուհետև պաշտոնական արարողությունից հետո Ռոբերտ
Խաչատրյանը ներկա է եղել նաև նախագահ Վահագն Խաչատուրյանի և Կատարի Պետության էմիր շեյխ Թամիմ բին Համադ Ալ Թանիի հետ հանդիպմանը։
Հաջորդիվ՝ հանդիպում է տեղի ունեցել Կատարի Պետության կապի և տեղեկատվական տեխնոլոգիաների նախարար Մոհամմեդ բին Ալի Ալ Մաննաիի հետ:
Քննարկվել են բարձր տեխնոլոգիաների ոլորտում երկու երկրների միջև թվայնացման, տեղեկատվական տեխնոլոգիաների, արհեստական բանականության, կիբեռանվտանգության, ոլորտային այլ ուղղություններով համագործակցության զարգացման հնարավորությունները։ Անդրադարձ է կատարվել համատեղ նախաձեռնություններին և ծրագրերին առնչվող մի շարք հարցերի:
Հանդիպման ավարտին Կատարի կապի և տեղեկատվական տեխնոլոգիաների նախարար Մոհամմեդ բին Ալի Ալ Մաննաին Ռոբերտ Խաչատրյանին հրավիրել է մասնակցելու Կատարում կայանալիք «Վեբհամաժողովին»։
Պայմանավորվածություն է ձեռք բերվել առաջիկայում շարունակել սերտ համագործակցությունն ու ընդլայնել փոխգործակցության ոլորտները:
Այցի շրջանակում նախարարն այցելել է նաև Կատարի ազգային գրադարան, Կատարի Իսլամական արվեստի թանգարան, Կատար հիմնադրամ և Կատարի գիտատեխնոլոգիական պարկ, ծանոթացել հիմնադրամի և տեխնոպարկի գործունեությանը։ Կատարի Պետությունում Հայաստանի Հանրապետության դեսպանատանը մասնակցել է Կատարի հայ համայնքի ներկայացուցիչների հետ հանդիպմանը:
