ՀՀ ԲՏԱ նախարարի տեղակալ Ռուբեն Սիմոնյանը DigiTec 2025-ի շրջանակում մասնակցել է «Կիսահաղորդիչներ X Արհեստական բանականություն» պանելային քննարկմանը

Հոկտեմբերի 10-ին ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը մասնակցել է DigiTec 2025 տեխնոլոգիական ցուցահանդեսի շրջանակում կազմակերպված «Կիսահաղորդիչներ X Արհեստական բանականություն․ Հայաստանի հնարավորությունը՝ առաջնորդելու խելացի սարքավորումների դարաշրջանում» թեմայով պանելային քննարկմանը։

Իր ելույթում Սիմոնյանը կարևորել է կիսահաղորդչային ոլորտի զարգացումը որպես Հայաստանի տեխնոլոգիական առաջընթացի ռազմավարական ուղղություն՝ ընդգծելով պետական քաղաքականության և կրթական ռազմավարությունների առանցքային դերը։ Նա շեշտել է հատկապես կիսահաղորդչային ինդուստրիայի զարգացմանն ուղղված ծրագրերի խրախուսման և զարգացման անհրաժեշտությունը համալսարաններում՝ դիտարկելով դրանք որպես ոլորտի կայուն աճի հիմք։

Նախարարի տեղակալն ընդգծել է գիտահետազոտական (R&D) գործունեության խթանման և արհեստական բանականության կիրառման կարևորությունը կիսահաղորդչային ճարտարագիտության մեջ։ Անդրադարձել է նաև Հայաստանում առկա ինժեներական մեծ ներուժին՝ որպես երկրի մրցակցային առավելություններից մեկը։

Պանելային քննարկմանը մասնակցել են ոլորտի համաշխարհային առաջատար փորձագետներ, ովքեր ներկայացրել են իրենց տեսլականն ու փորձը կիսահաղորդչային և արհեստական բանականության տեխնոլոգիաների զարգացման ուղղությամբ։ 

Մասնակիցների թվում էին Broadcom ընկերության ճարտարագիտության գծով տնօրեն Խաչիկ Նազարյանը, Microchip ընկերության FPGA արտադրանքի մշակման ավագ տնօրեն Ռաջիվ Ջայարամանը, AMD ընկերության կորպորատիվ փոխնախագահ Ամիտ Գուպտան և Instigate ընկերության համահիմնադիր և նախագահ Էնո Վայնը, ինչպես նաև տեխնոլոգիական ձեռնարկատեր Ադամ Քաբլանյանը։