Բարձր տեխնոլոգիական արդյունաբերության նախարարություն
Գևորգ Մանթաշյանը մասնակցել է Դավոսի Համաշխարհային տնտեսական համաժողովին
ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը ՀՀ նախագահ Վահագն Խաչատուրյանի գլխավորած պատվիրակության կազմում hունվարի 15-18-ը մասնակցել է Շվեյցարիայի Համադաշնության Դավոս քաղաքում կայացած Համաշխարհային տնտեսական համաժողովի 54-րդ ամենամյա տարեկան հանդիպմանը:
Գևորգ Մանթաշյանը Հայաստանի պատվիրակության կազմում մասնակցել է մի շարք պետությունների և միջազգային կազմակերպությունների պատվիրակությունների, այդ թվում՝ Հեռահաղորդակցության միջազգային միության (ՀՄՄ) գլխավոր քարտուղար Դորին Բոգդան-Մարտինի, Տնտեսական համագործակցության և զարգացման կազմակերպության (OECD) գլխավոր քարտուղար Մաթիաս Կորմանի, Արժույթի միջազգային հիմնադրամի (IMF) ղեկավար Կրիստալինա Գեորգիևայի հետ տեղի ունեցած հանդիպումներին:
Համաժողովի շրջանակներում Գևորգ Մանթաշյանը մասնակցել է պանելային քննարկմանը՝ նվիրված զարգացող տնտեսություններում կիսահաղորդիչների արտադրության խնդիրներին:
Նախարարի առաջին տեղակալը հանդիպումներ է ունեցել մի շարք ընկերությունների ղեկավարների հետ, քննարկել ՀՀ-ում գործունեություն ծավալելու հնարավորությունները, այդ թվում՝ «Ինժեներական քաղաքում» ընկերության ռեզիդենտության կարգավիճակի և Հայաստանում հետազոտական մասնաճյուղ հիմնելու հարցը:
Գևորգ Մանթաշյանը նաև առանձին հանդիպումներ է ունեցել միջազգային գործընկերների հետ, որպես Համաշխարհային տնտեսական համաժողովի ներքո Արհեստական բանականության (ԱԲ) կառավարման դաշինքի անդամ, Accenture խորհրդատվական ընկերության հետ համագործակցությամբ, որպես համահեղինակ ներկայացվել է «Գեներատիվ ԱԲ կառավարում. Կոլեկտիվ գլոբալ ապագայի ձևավորում» զեկույցը: Զեկույցում անդրադարձ է կատարվել ԱԲ կարգավորման, կառավարման, տեխնոլոգիայի զարգացման մոտեցումներին, ոլորտի զարգացմանն ուղղված նախաձեռնությունների Հայաստանի պատկերացումներին:
Դավոսի տնտեսական համաժողովն այս տարի անցկացվել է «Վստահության վերակառուցում» խորագրի ներքո՝ միավորելով տասնյակ պետությունների կառավարությունների, քաղաքացիական հասարակության, գործարար, ակադեմիական համայնքների, ինչպես նաև՝ միջազգային կազմակերպությունների ներկայացուցիչների՝ համաշխարհային տնտեսության առաջնային խնդիրները քննարկելու և տնտեսական համագործակցության նոր մեխանիզմների ձևավորմանը նպաստելու նպատակով: Միջոցառման շրջանակներում տեղի են ունեցել միջազգային անվտանգությանն ու համագործակցությանը, աշխատատեղերի ապահովմանը, արհեստական բանականությանը, կլիմայական խնդիրներին նվիրված թեմատիկ նիստեր:
