Նկարագիր

«Կիբեռանվտանգության հաքաթոնն» իրականացվել է 2025 թվականի հուլիսի 9-11-ին, Ծաղկաձորում՝ Տեղեկատվական տեխնոլոգիաների գործակալության հետ համագործակցությամբ:

Այն հիմնված է փորձառական ուսուցման մոտեցման վրա և համատեղում է տեսական ու գործնական բաղադրիչներ։ Մասնակիցները ներգրավվում են իրականությանը մոտեցված կիբեռմիջադեպերի և հարձակման սցենարների լուծման գործընթացում՝ աշխատելով թիմային ձևաչափով և կիրառելով տեղեկատվական անվտանգության ժամանակակից գործիքներ ու մեթոդներ։

Ծրագրի շրջանակում մասնակիցներին տրամադրվում է մասնագիտական աջակցություն փորձառու մենթորների կողմից, ինչը նպաստում է նրանց ինչպես անհատական, այնպես էլ թիմային կարողությունների զարգացմանը։

Հաղթող թիմերը որոշվում են գնահատող հանձնաժողովի կողմից:

Ծրագիրը միաժամանակ ծառայում է որպես հարթակ մասնագիտական փորձի փոխանակման, լավագույն փորձի տարածման և ոլորտի մասնագետների միջև համագործակցության նոր կապերի ստեղծման համար։

Ծրագրի առանցքային արդյունքներից են մասնակիցների գործնական հմտությունների զարգացումը, կիբեռդիմակայունության մակարդակի բարձրացումը, արագ արձագանքման կարողությունների կատարելագործումը և տեղեկատվական անվտանգության ոլորտում մասնագիտական համայնքի ամրապնդումը։

Ծրագիրը ներառում է մասնագիտական սեմինարներ, դասախոսություններ, մենթորական աջակցություն, թիմային աշխատանքներ:

Ծրագրի նպատակը

Ծրագրի նպատակը մասնակիցների կարողությունների զարգացումն է կիբեռհանցագործությունների և կիբեռսպառնալիքների կանխարգելման, հայտնաբերման, դրանց հակազդման և հետևանքների վերացման ոլորտներում, ինչպես նաև կիբեռանվտանգության բնագավառում միջգերատեսչական և պետություն-մասնավոր հատված համագործակցության խթանումը։

Թիրախային խումբը

«Կիբեռանվտանգության հաքաթոնը» միավորում է ՀՀ պետական մարմինների, ֆինանսական կազմակերպությունների, կրիտիկական ենթակառուցվածքների և տեղեկատվական անվտանգության ոլորտի մասնագետներին:

Մասնակցության չափորոշիչները

Մասնակիցների ընտրությունը կատարվում է՝ հաշվի առնելով նրանց մասնագիտական փորձը, տեղեկատվական անվտանգության և հարակից ոլորտներում գիտելիքների մակարդակը, ներկայացվող կազմակերպության գործունեության բնույթը, ինչպես նաև ծրագրի շրջանակում ձեռք բերվելիք գիտելիքներն ու հմտությունները գործնականում կիրառելու ներուժն ու ակնկալիքը։

Առաջնահերթությունը տրվում է կրիտիկական ենթակառուցվածքների, պետական մարմինների և կիբեռանվտանգության ոլորտում ներգրավված կազմակերպությունների ներկայացուցիչներին։

Մասնակցության պայմանները

Հաքաթոնն իրականացվում է ՀՀ կառավարության ֆինանսավորմամբ:

Ապահովվում է մասնակիցների կեցությունը, սնունդը, տեղափոխումը միջոցառման անցկացման վայր և վերադարձը:

Դիմելու կարգը

Ծրագրին դիմելու համար լրացվում է հրապարակված հայտադիմումը և ներկայացվում է անհրաժեշտ տեղեկատվությունը:

Իրականացվում է հայտերի գնահատում և մասնակիցների ընտրություն:

Ընտրված թիմերը հրավիրվում են մասնակցելու հաքաթոնին:

Լրացուցիչ տեղեկատվութուն

«Կիբեռանվտանգության հաքաթոնն» իրականացվել է ՀՀ ԲՏԱ նախարարության «Մասնագետների պատրաստման բուհ-մասնավոր հատված համագործակցություն» ծրագրի «Գործնական հմտությունների կատարելագործում» բաղադրիչի շրջանակում:

Հաքաթոնի եռօրյա աշխատանքներին մասնակցել են ՀՀ պետական կառույցների, ֆինանսական, հեռահաղորդակցության և կենսական նշանակության ծառայություններ մատուցող կազմակերպությունների 65 աշխատակից՝ կազմելով 10 թիմ:

Հաքաթոնի ընթացքում ներկայացվել է ամերիկյան «SimSpace» ընկերության կողմից պատրաստված հարթակը, վերջինիս հիմնական գործառույթները, ինչպես նաև սիմուլյացիոն մրցույթի կանոնները: Այստեղ են արտացոլվել հաղթող թիմերի միավորները։

Հարթակը մոդելավորել էր «Bronze Butler» կիբեռհաքերային խմբի գործողությունների վրա հիմնված կենդանի հարձակման իրավիճակ։ Մասնակիցներին տրվել է առաջադրանք՝ վերլուծել տվյալները (logs), հայտնաբերել ներխուժման հետքերն ու ապացույցները։

Հրավիրված մենթորները ներկայացնում էին «Sim Space» ընկերությունը: Մասնագետները ոչ միայն հանդես եկան որպես միջոցառման փորձագետներ, այլև աջակցեցին մասնակիցներին հարթակի կիրառման, սիմուլյացիոն սցենարի իրականացման և առաջադրանքների կատարման գործընթացներում։

Մրցապայքարում մասնակիցները ներկայացրել են տվյալների պաշտպանության, կիբեռհարձակումների դիմագրավման, ցանցային անվտանգության բարելավման, սպառնալիքների վաղ հայտնաբերման վերաբերյալ լուծումներ:

Առաջին մրցանակին է արժանացել «Access Denied» թիմը՝ ստանալով 2,5 մլն ՀՀ դրամ, երկրորդ մրցանակին՝ «Թիվ 1» թիմը՝ ստանալով 1,5 մլն ՀՀ դրամ, երրորդ մրցանակին՝ «HackShield» թիմը՝ ստանալով 1 միլիոն ՀՀ դրամ:

Ծրագրի բոլոր մասնակիցները ստացել են հավաստագրեր:

Կոնտակտային տվյալներ

Հարցերի դեպքում կարող եք կապ հաստատել info@hti.am էլ․ փոստի միջոցով կամ +374 10590186 հեռախոսահամարով: