Ավելի քան 100 ուսանող կմշակեն և կներկայացնեն տեխնոլոգիական ոլորտին առնչվող նորարարական լուծումներ. մեկնարկել է Ուսանողական երրորդ հաքաթոնը

Ծաղկաձորում մեկնարկել է ՀՀ բարձր տեխնոլոգիական արդյունաբերության նախարարության կողմից իրականացվող Ուսանողական երրորդ հաքաթոնը։ 

Մայիսի 12-15-ն անցկացվող միջոցառումը համախմբել է հայաստանյան բուհերի և կրթական կենտրոնների ավելի քան 100 ուսանողի։ Նպատակը երիտասարդների նորարարական ներուժի խթանումն է, թիմային աշխատանքի և տեխնոլոգիական խնդիրների լուծման հմտությունների զարգացումը, ինչպես նաև պետության, ուսանողների և տեխնոլոգիական համայնքի միջև համագործակցության հարթակի ձևավորումը։

Բացման հանդիսավոր արարողությանը մասնակիցներին ողջունել է նախարարության Տեխնոլոգիական էկոհամակարգի զարգացման վարչության պետ Հայկ Ենգիբարյանը։ 

Նա ընդգծել է, որ բարձր տեխնոլոգիաների զարգացման ռազմավարության առանցքային նպատակներից է՝ Հայաստանը դիրքավորել որպես դիփ-թեք խաչմերուկ և տարածաշրջանային գիտահետազոտական կենտրոն, նաև կարևորել նման նախաձեռնությունների դերն այդ ճանապարհին։ 

Մասնակիցներին ողջունել է նաև Ռուս-հայկական համալսարանի Մաթեմատիկայի, ֆիզիկայի և բարձր տեխնոլոգիաների ինստիտուտի տնօրեն Ահարոն Ահարոնյանը։

Նա նշել է, որ նախարարության նախաձեռնությամբ իրականացվող նման միջոցառումները կարևոր հարթակ են ուսանողների համար՝ իրենց գաղափարները ներկայացնելու, նոր գիտելիքներ ու փորձ ձեռք բերելու, գործնական հմտությունները զարգացնելու տեսանկյունից։ 

Միջոցառմանը ներկա էին Ծաղկաձոր համայնքի ղեկավար Նարեկ    Հովհաննիսյանը, Հայաստանի ազգային ագրարարային համալսարանի ռեկտոր Հրաչյա Զաքոյանը, Վանաձորի Հովհաննես Թումանյանի անվան համալսարանի ռեկտոր Արմեն Ծատուրյանը, այլ պաշտոնատար անձինք։

Բացման արարողությունից հետո մասնակիցների համար «Ինչպե՞ս ներկայացնել ստարտափը և ինչպե՞ս ներկայանալ լսարանի առաջ» թեմայով վարպետության դաս է անցկացրել դասախոս Սերգեյ Թանթուշյանը։

Հաքաթոնին մասնակցելու հայտ էր ներկայացրել ՀՀ բուհերի և ուսումնական կենտրոնների 46 թիմ, որոնցից ընտրվել են լավագույն 26-ը։

Մասնակից թիմերը ներկայացնում են Երևանի պետական համալսարանը, Հայաստանի ազգային պոլիտեխնիկական համալսարանը, Ռուս-հայկական համալսարանը, Հայաստանի ամերիկյան համալսարանը, Երևանի պետական տնտեսագիտական համալսարանը, Հայաստանի ազգային ագրարային համալսարանը, ինչպես նաև Վանաձորի և Գորիսի պետական համալսարանները, «Արմաթ» ինժեներական լաբորատորիան ու «Միտ» կրթական կենտրոնը։

Հաքաթոնի ավարտին՝ լավագույն նախագծերը կարժանանան դրամական մրցանակների՝ 1-ին տեղը՝ 1.5 մլն դրամ, 2-րդ տեղը՝ 1 մլն դրամ, 3-րդ տեղը՝ 0.5 մլն դրամ։

Չորսօրյա միջոցառման ընթացքում թիմերը մենթորների աջակցությամբ կմշակեն և կներկայացնեն տեխնոլոգիական ոլորտին առնչվող նորարարական լուծումներ։ Թեմաները կընտրվեն Բարձր տեխնոլոգիաների ոլորտի զարգացման ռազմավարական ծրագրով սահմանված առաջնահերթ ուղղություններից՝ ներառելով արհեստական բանականությունը, տվյալագիտությունն ու մեքենայական ուսուցումը, ծրագրային ապահովման մշակումը, կենսաճարտարագիտությունն ու բժշկական տեխնոլոգիաները, առաջադեմ ճարտարագիտական և կայուն տեխնոլոգիական լուծումները։