Գևորգ Մանթաշյանը Էստոնիայում մասնակցել է «Թվային նորարարությունը որպես սոցիալական փոփոխության կատալիզատոր» համաժողովին

ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը մայիսի 29-31-ը մասնակցել է Էստոնիայում տեղի ունեցած «Թվային նորարարությունը որպես սոցիալական փոփոխության կատալիզատոր»   (Digital Innovation as Catalyst for Social Change) էլեկտրոնային կառավարման իններորդ համաժողովին։

Համաժողովի շրջանակում քննարկվել են տարբեր պետություններում տնտեսության, հասարակության և պետական կառավարման թվային փոխակերպմանն առնչվող մի շարք թեմաներ։

Տեղի են ունեցել պանելային քննարկումներ տնտեսության զարգացման գործում թվային տեխնոլոգիաների նշանակության, կարողությունների զարգացման անհրաժեշտության և նորարարության խթանման վերաբերյալ։

Գևորգ Մանթաշյանը մասնակցել է «How digital innovation boosts social and economic change» խորագրով պանելային քննարկմանը, ներկայացրել է Հայաստանի թվայնացման 2021-2025թթ. ռազմավարության շրջանակում իրականացվող նախաձեռնությունները, բարձր տեխնոլոգիական էկոհամակարգի զարգացման ծրագրերը, ոլորտի հիմնական առաջնահերթություններն ու խնդիրները: Նախարարի առաջին տեղակալն  անդրադարձել է նաև նորարարության խթանման և զարգացման գործընթացում Հայաստանի ունեցած փորձին։

Այցի շրջանակում Գևորգ Մանթաշյանը հանդիպում է ունեցել Էստոնիայի տնտեսական հարցերի և տեղեկատվական տեխնոլոգիաների նախարար Տիիտ Ռիսսալոյի և  նախարարի տեղակալ Սիլլե Կրաամի հետ: Հանդիպման ընթացքում  քննարկվել են ՀՀ բարձր տեխնոլոգիական արդյունաբերության նախարարության և Էստոնիայի Հանրապետության տնտեսական հարցերի և հաղորդակցության նախարարության միջև 2023թ.հունվարին նորագույն տեխնոլոգիաների ոլորտում փոխգործակցության մասին ստորագրված 

Փոխըմբռնման հուշագրի դրույթների իրականացման, երկկողմ համագործակցության օրակարգին առնչվող հարցեր:

Էստոնիայի էլեկտրոնային կառավարման ակադեմիայի գործադիր տնօրեն Հաննես Ասթոկի հետ ունեցած հանդիպմանն անդրադարձ է կատարվել տեխնոլոգիական կրթության, էլեկտրոնային կառավարման ոլորտներում համագործակցության, փորձի փոխանակման  վերաբերյալ հարցերին:

Գևորգ Մանթաշյանն այցելել է նաև Էստոնիայի Հանրապետության կառավարություն, որտեղ  ծանոթացել է էլեկտրոնային կառավարման ուղղությամբ իրականացվող աշխատանքներին, թվային ծառայությունների տրամադրման, թվային կառավարման ոլորտում Էստոնիայի ունեցած փորձին:

Այցի ընթացքում նախարարի առաջին տեղակալը մի շարք հանդիպումներ  է ունեցել միջոցառմանը մասնակից տարբեր պետությունների պատվիրակությունների ղեկավարների և  ներկայացուցիչների հետ:

«Թվային նորարարությունը որպես սոցիալական փոփոխության կատալիզատոր» (Digital Innovation as Catalyst for Social Change) էլեկտրոնային կառավարման իններորդ համաժողովը կազմակերպվել էր Էստոնիայի տնտեսական հարցերի և տեղեկատվական տեխնոլոգիաների նախարարության, Էստոնիայի արտաքին գործերի նախարարության և Էստոնիայի էլեկտրոնային կառավարման ակադեմիայի կողմից։