ՀՀ բարձր տեխնոլոգիական արդյունաբերության նախարարության «Գաղափարից մինչև բիզնես» դրամաշնորհային ծրագրի «Գաղափարի փուլ» բաղադրիչի շրջանակում մրցույթի առաջին փուլը հաղթահարած 39 կազմակերպությունների համար անցկացվել է մեկօրյա ինտենսիվ դասընթաց։

Միջազգային հեղինակավոր «Plug and Play» աքսելերացիոն կազմակերպության հետ համագործակցությամբ իրականացված դասընթացի ընթացքում աքսելերատորի մենթոր Լարս Վեստերգարդը մասնակիցներին է փոխանցել պատկերավոր ներկայացման (pitching) հմտությունները, անդրադարձել ներկայացման կառուցվածքին, ինչպես նաև ներդրողների ու փորձագետների առջև հաջող ելույթ ունենալու հիմնական սկզբունքներին։ Փորձագետները մանրամասնել են, թե ինչպես կարելի է մրցույթի գնահատող հանձնաժողովին արդյունավետ ու համոզիչ ներկայանալ և առավել հստակ թիրախավորել սեփական բիզնես գաղափարները։ 

Նախարարության Տեխնոլոգիական էկոհամակարգի զարգացման վարչության մասնագետ Ալվարդ Վարդանյանը մասնակիցներին է ներկայացրել ծրագրով նախատեսված պայմանագրային պարտավորությունները, հաշվետվությունների ներկայացման կարգը, ժամկետները և ծրագրի իրականացման հիմնական ընթացակարգերը։

Հիշեցնենք, որ մրցույթի երկրորդ փուլի արդյունքներով մինչև 15 կազմակերպություն կստանա մինչև 5 մլն ՀՀ դրամ դրամաշնորհային աջակցություն՝ իրենց նորարարական գաղափարները կենսունակ բիզնեսի վերածելու համար։