ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանն ընդունել է Siemens ընկերության ներկայացուցիչներին

ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանն, ապրիլի 3-ին ընդունել է Siemens ընկերության ներկայացուցիչներին՝  Siemens EDA-ի (ԱՄՆ) գլխավոր գործադիր տնօրեն Մայք Էլլոուի, «Սիմենս Ինդասթրի Սոֆթվեր» (Հայաստան) գլխավոր տնօրեն Իրինա Դումանյանի գլխավորթյամբ՝ քննարկելու Հայաստանում ընկերության գործունեության խորացման և զարգացման հեռանկարներն ու հնարավորությունները:

Ռուբեն Սիմոնյանը, ողջունելով հյուրերին, ներկայացրել է նախարարության ծրագրերն ու նախաձեռնությունները, որոնք միտված են տեխնոլոգիական ոլորտի զարգացմանը։ Նա մանրամասն անդրադարձել է նախարարության յոթամյա օրենսդրական փաթեթին, որը նախատեսում է պետական աջակցության նոր գործիքակազմ և հարկային արտոնություններ տեխնոլոգիական ընկերությունների համար՝ ստեղծելով առավել բարենպաստ պայմաններ ոլորտի զարգացման ու ներդրումների համար։

Սիմոնյանը ներկայացրել է նաև Հայաստանի տեխնոլոգիական ոլորտի ներկա վիճակը, առկա ներուժը, մարդկային ռեսուրսների առանձնահատկությունները, ինչպես նաև ոլորտի զարգացման պետական ռազմավարությունն ու տեսլականը։

Մայք Էլլոուն, իր հերթին, կիսվել է Հայաստան կատարած իր առաջին այցի տպավորություններով, ներկայացրել է ընկերության հայաստանյան գրասենյակի գործունեությունը, բուհերում իրականացվող տարբեր ծրագրերի մանրամասները, ինչպես նաև Հայաստանում ընկերության հետագա գործունեության տեսլականն ու ակնկալիքները։

Հանդիպման ընթացքում կողմերը քննարկել են փոխադարձ հետաքրքրություն ներկայացնող գաղափարներ՝ ձեռք բերելով պայմանավորվածություններ համագործակցության խորացման հետագա քայլերի վերաբերյալ։

Siemens Industries Software-ը էլեկտրոնային սարքավորումների և ծրագրային ապահովման նախագծման լուծումների համաշխարհային առաջատար է, որն ապահովում է ապրանքներ, խորհրդատվական ծառայություններ և աջակցություն էլեկտրոնիկայի և կիսահաղորդչային արտադրության աշխարհի ամենահաջողակ ընկերություններին:

Siemens Industry Software Armenia-ն ներկայումս ունի շուրջ 200 աշխատակից, որոնց 95%-ը զբաղվում է հետազոտական և մշակման աշխատանքներով։ Ընկերությունն ակտիվորեն զարգանում է՝ տարեկան ավելացնելով աշխատակիցների թիվը։