ԲՏԱՆ աշխատակիցները ծանոթացել են Ինժեներական քաղաքի տեխնոլոգիական ներուժին

Դեկտեմբերի 23-ին ՀՀ բարձր տեխնոլոգիական արդյունաբերության նախարարության աշխատակիցներն այցելել են Ինժեներական քաղաք՝ տեղում ծանոթանալու գործող ինժեներական, գիտատեխնիկական և բարձր տեխնոլոգիական ենթակառուցվածքներին։

Աշխատակիցներին դիմավորել է Ինժեներական ասոցիացիայի նախագահ Արամ Սալաթյանը, որը ներկայացրել է Ինժեներական քաղաքի գործունեության հիմնական ուղղությունները, զարգացման տեսլականը և առաքելությունը։

Նախարարության աշխատակիցներն այցելել են «NI Emerson» ընկերություն, որտեղ գործադիր տնօրեն Արսեն Առուստամյանը ներկայացրել է ընկերության գործունեությունը և լաբորատոր հնարավորությունները։ Նրանք այցելել են նաև Ինժեներական քաղաքի արտադրամաս, որտեղ տնօրեն Արամ Ղուկասյանը ծանոթացրել է առկա արտադրական հնարավորություններին։

Աշխատակիցները շրջայց են կատարել Ինժեներական քաղաքի մի շարք առանցքային կառույցներում՝ այցելելով Գիտության և տեխնիկայի, Տիեզերքի թանգարաններ։  Այցի ընթացքում ներկայացվել է նաև Գերհամակարգչային կենտրոնի գործունեությունը,  իրականացվել է շրջայց Բարձր տեխնոլոգիական աքսելերատորի շենքում։

ԲՏԱ նախարարության աշխատակիցների այցն Ինժեներական քաղաք ամփոփվել է ՀՀ բարձր տեխնոլոգիական արդյունաբերության նախարարի  տեղակալ Ռուբեն Սիմոնյանի՝ «Հայաստանի տեխնոլոգիական էկոհամակարգը․ Հայաստանի դերը կիսահաղորդչային արտադրության արժեշղթայում» թեմայով դասախոսությամբ: Նախարարի տեղակալը ներկայացրել է Հայաստանում կիսահաղորդչային ոլորտի զարգացման ողջ պատմությունը, Հայաստանում գործող վերազգային կազմակերպությունների գործունեությունը և իրականացված աշխատանքները, որոնց շնորհիվ Հայաստանը կարողացել է ամրապնդել իր դիրքերը  կիսահաղորդչային արտադրության հիմնական փուլերում։

Այցը կազմակերպվել էր «Ձեռնարկությունների ինկուբատոր» հիմնադրամի (EIF) կողմից: