ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը հունիսի 16-ին Ինժեներական քաղաքում հանդիպում է ունեցել պետական կառավարման համակարգի գերատեսչությունների ներկայացուցիչների հետ՝ ներկայացնելով  նախարարությունում Microsoft 365 փաթեթի ներդրման փորձնական ծրագրի արդյունքները:

Նախարարի տեղակալը հանդես է եկել բացման խոսքով՝ ներկայացնելով ծրագրի նպատակներն ու հիմնական ուղղությունները: Ռուբեն Սիմոնյանն ընդգծել է պետական կառավարման համակարգի թվայնացման ռազմավարական նշանակությունը և արդի տեխնոլոգիաների կիրառմամբ պրոֆեսիոնալ, արդյունավետ ու ճկուն աշխատանքային միջավայր ձևավորելու անհրաժեշտությունը։

Նախաձեռնության հիմնական նպատակն է ապահովել ՀՀ բարձր տեխնոլոգիական արդյունաբերության նախարարության թվային վերափոխումը, բարձրացնել աշխատակիցների համագործակցության և հաղորդակցության արդյունավետությունը, ապահովել ծառայությունների հասանելիությունն ու անխափանությունը, ուժեղացնել տեղեկատվական անվտանգության մակարդակը, ինչպես նաև ստեղծել ժամանակակից, անվտանգ և ճկուն թվային աշխատանքային միջավայր։

Ծրագրի արդյունավետ և համակարգված գործարկումն ապահովելու նպատակով նախարարությունը նախապես բանակցություններ է վարել տեխնոլոգիական հսկա Microsoft ընկերության հետ, ինչի արդյունքում կնքվել է համագործակցության պայմանագիր։ 

Իրականացվել են մի շարք կարևոր աշխատանքներ, մասնավորապես՝ սերվերային ենթակառուցվածքի ամբողջական նախագծում՝ ամպային տեխնոլոգիաների ներդրմամբ, տեխնիկական վերազինում՝ օգտատերերի համակարգիչների փոխարինում և արդիականացում  նոր համակարգերին համապատասխանեցնելու նպատակով, աշխատանքային գործիքակազմի ինտեգրում՝  Microsoft 365 փաթեթի, ինչպես նաև ներքին հաղորդակցության օպտիմալացման համար Microsoft Teams հարթակի ներդրում և լիարժեք շահագործում, էլեկտրոնային նամակագրություն՝  Microsoft Exchange սերվերի նախագծում և գործարկում, կիբեռանվտանգություն՝  տվյալների պաշտպանության բարձր չափանիշներով օժտված, առավել անվտանգ թվային միջավայրի ստեղծում։

ԲՏԱ նախարարության մասնագետները ներկայացրեցին ծրագրի իրականացման շրջանակներում առաջացած խոչընդոտները և դրանց հաղթահարմանն ուղղված լուծումները, ծրագրի առավելությունները և առաջիկա քայլերը։

Մասնակիցները հնարավորություն ունեցան քննարկելու ամպային ու թվային լուծումների տեղայնացման և ներդրման հեռանկարները: Հանդիպման ավարտին ԲՏԱ նախարարության մասնագետները պատասխանեցին գերատեսչությունների ներկայացուցիչներին հետաքրքրող մասնագիտական ու տեխնիկական հարցերին։